Tuan Rumah : Sutan Parpatih
Tamu : Sutan Parmato
Sutan Parpatih : Sutan Parmato, panitahan tibo bakeh sutan
Sutan Parmato : manitahlah sutan parpatih
Sutan Parpatih : Walaupun sutan parmato surang tampek ambo ka manibokan sambah jo titah, nak sarapeknyolah ninik mamak sagaji guru sarato sado nan bakarapatan tangah rumah, katampek ambo manibokan sambah jo titah. indak ka diatok kadibilang gala sado nan taratok tabilang jo gala, jo sambah ambo muliakan.
Bukan pulo ambo maraso kamalinteh jo malampaui ninik mamak silang nan bapangka karajo nan bapokok, sungguhpun di ambo tarabiknyo sambah, alah izin koto mufakat diambo manibokan sambah kahadapan sutan parmato, laikoh sambah jo titah tibo kahadapan sutan parmato?
Sutan Parmato : sambah di Allah manitahlah sutan Parpatih
Sutan Parpatih : Sambah jo titah nan ka ambo tibokan kahadapan sutan parmato nan bak kini hari, karana kok jauh nan alah bajalang, ampia nan alah baturuik, janjang tatagak lah batingkek, bandua tabantang lah batapiak, lapiak takambang lah bakadudu-i.
karano biaso juo manuruik undang, caliak jauh balayangkan, caliak ampie batukiakan, mamandang pado hidangan nan katangah, galeh nan lah baisi aie.
Bulek nan sagiliang, pipih na satapik tibonyo dek silang nan bapangka karajo nan bapokok, ateh hidangan nan katangah minta disantap, galeh nan baisi aie minta diminum kahadapan ninik mamak sagaji guru sarato sdo nan bakarapatan tanggah rumah. ikolah sambah nan ambo tibokan kahadapan sutan parmato.
Sutan Parmato : sampai sutan parpatih.?
Sutan Parpatih : sakiro-kiro sampai sutan parmato
Sutan Parmato : Sutan parpatih..... Tapi, aratinyo sambah manyambah kapado Allah kito kumbalikan, salawat dan salam kito puhunkan kapado nabi. Adopun sambah jo titah buah panitahan sutan parpatih sajo nan diamba gadang dianjuang tinggi, adopun samaso dihari nan cako lah taanta buah panitahan di sutan parpatih kahadapan ambo. aa yo tu, nan manjadi buah panitahan sutan parpatih. bukan sutan malinteh jo malampui ninik mamak silang nan bapangka karajo nan bapokok, sungguhpun dari sutan datangnyo panitahan, alah izin kato mufakat untuk manibokan sambah jo titah kahadapan ambo. kan baitu bana lalunyo buah panitahan sutan parpatih?
Sutan parpatih : sinan bana tibonyo sutan parmato.
Sutan Parmato : Adopun sambah jo titah sutan parpatih tibokan kahadapan ambo nan bak kini hari. karano biaso juo nan manuruik undang. kok diateh namonyo karajo kita nan manuruik sapanjang syarak. alah diawali jo bismillah, lah ditutuik jo alhamdulillah. mudah-mudahan sagalo niat kito ditarimo di allah swt disampaikan ka bakeh almarhum yang kito mukasuik.
Bulek nan sagiling pipih nan satapik tibonyo dek silang nan bapangka karajo nan bapokok. karano biaso juo nan manuruik undang. kok basiang tantu diateh nan tumbuh, kok manimbang tantu diateh nan ado. Tumbuh di saroman iko kini. kok dicaliak jauh balayangkan, kok di caliak ampie batukiakkan. Ditantangan hidangan nan katangah, galeh nan lah baisi aie. bulek sagiling pipih nan satapik tibonyo dek karajo dan bapokok silang nan bapangka. kok hidangan minta disantap, kok galeh nan baisi aie minta diminum kahadapan ninik mamak sagaji guru sarato sado nan bakarapatan diateh rumah nangko, kan baitu lalunyo buah panitahan sutan parpatih?
Sutan Parpatih : Sinan bana tibonyo sutan parmato.
Sutan Parmato : Sutan Parpatih..... tapi aratinyo sambah jo titah buah panitahan sutan parpatih sajo nan diamba gadang dianjuang tinggi. adopun samaso dihari nan cako lah taanta di sutan parpatih kahadapan ambo.
Baa di ambo, karano ado pulo nan manuruik sapanjang adat. Adat kato nan baiyo, elok jalan nan ba amuah. dek karano ambo lai duduk di hadapan ninik mamak sagaji guru. kato dibaok jo mufakat, bana dicari jo baiyo, mananti sutan parpatih sakiro-kiro. laikoh manuruik sapanjang adat nan baitu sutan parpatih?
Sutan Parpatih : Sakiro sampai sutan parmato?.
Sutan Parmato : Sakiro sampai sutan parpatih
Sutan Parpatih : Tapi aratinyo sambah jo titah sutan parmato sajo nan diamba gandang dianjuang tinggi. adopun samaso di hari nan cako lah taanta di ambo buah panitahan kahadapan sutan parmato. baa dek sutan parmato, karana ado pulo nan manuruik sapanjang adak. dek karano sutan parmato lai duduk dihadapan ninik mamak sagaji guru nan pai satampuh pulang sabondong. Dibao pulo kato jo mufakat, manjapuikkan nan kabuah barinyo. mananti sutan parpatih sakiro-kiro. laikoh manuruik sapanjang adaik nan baitu, kan baitu bana lalunyo buah panitahan sutan parmato?
Sutan Parmato : Yoo lah
Sutan Parpatih : tan kato sutan parpatih manjapuikkan nan kabarinyo, sifat mananti malah ambo
Sutan Parmato : Tan kato ambo manjapuikkan nan kabarinyo, sutan parpatih mananti lai kasaba?
Sutan Parpatih : Sakiro-kiro
Sutan Parmato berunding dengan Ninik mamak yang lain kemudian mengumbalikan pado sutan parpatih
Sutan Parmato : Sutan parpatih, capek kumbalinyo kahadapan sutan parpatih
Sutan Parpatih : rancak capek
Sutan Parmato : Kacapekaanyoo, bak kato undang-undang cako, kato daulu basitinah kato kudian basicapek, capek kumbali kahadapan sutan parpatih. Adopun samaso dihari nan cako, karano lah taanta di sutan parpatih kahadapan ambo buah panitahan. adopun diambo alah dibao kato jo baiyo kahadapan ninik mamak sagaji guru. dapeklah kato nan sahati kabulatan kato samufakat. antah kok ari nan baik, antah kutiko nan elok. kok disilang nan bapangka, karajo nan bapokok, satiok kandak lai kabuliah, satiok pintak lai kabalakukan, kandak buliah pintak balaku, tapi limbak nan dari pado itu, juadah ko baujung bapangka, untuk manyamparunokannyo basaratokan jo karajo bapokok silang bapangka. bana kumbali kahadapan sutan parpatih.
Sutan Parpatih : Ruponyo sampai sutan parmato.?
Sutan parmato : Sakiro sampai sutan parpatih
Sutan Parpatih : Tapi aratinyo, bak kato undang cako. adat daulu kato basitinah, kamudian kato basicapek, lah sacaro capek sajo manjawab buah panitahan sutan parmato.
Sutan Parmato : rancak capek
Sutan Parpatih : Adopun samaso dihari nan cako. lah taanta diambo buah panitahan kahadapan sutan parmato. baa dek sutan parmato, lah bapakaikan manuruik undang. lah jalan nan pasa nan batampuh, batang tagolek nan batitih, jalan rayo titian batu. lah bapaiyo bapatidokan, lah bapauku bapajangkokan. lah disanak aie nan janiah. lah dicari kato nan bana kapado baliau nan hadir.
Dapeklah kato nan sahati, kabulatan kato samufakat, kok sapanjang permintaan dari silang nan bapangka karajo nan bapokok. kok kandak lai kadibari, pintak lah kadipalakukan. tapi limbak ateh nantun dek karano rumah ko lai baujung bapangka. maagak-i manpayamparunokannyo. iyo bana basaratoan juo di nan pangka. kan baitu bana lalunyo panitahan sutan parmato
Sutan Parmato : yooolah
Sutan Parpatih : Dek karano nan dijuluk alah lareh, nan dijapuik alah tabao, lah basanang hati karajo nan pokok silang nan bapangka tu sutan parmato
Sutan parmato : Tan kato nan dijuluk lah lareh nan dijapuik lah tabao, baa kolah pangayuh palalang kito sutan parpatih?
Sutan Parpatih : samo-samo kito lalukan sutan parmato
Sutan parmato : iyo bana kok bana sapari, sinan juo tibonyo, tabanglah dek sutan parpatih dari pangka, nak menyisiak kami disiko.
Sutan parpatih : samo-samo kito mulai jo bismillah
Sutan parmato : aaa, sinan bana tibonyo sutan parpatih, kato sapatah tu nan bananti.
0 Response to "Panitahan Ka Makan Mendoa Kematian Kurai Bukittinggi"
Post a Comment